ມູນນິທິອະນຸລັກສັດປ່າລາວແມ່ນສູນກູ້ໄພ, ອະນຸລັກ ແລະ ສຶກສາສັດປ່າທີ່ບໍ່ຫວັງຜົນກຳໄລແຫ່ງທຳອິດຂອງປະເທດລາວ. ພວກເຮົາເຮັດວຽກເພື່ອຫັນປ່ຽນສວນສັດລາວແຫ່ງນີ້ມາເປັນອົງການກຸສົນສັດປ່າລະດັບໂລກ ແລະ ຊ່ວຍປັບປຸງຊີວິດການເປັນຢູ່ຂອງສັດປ່າທຸກໂຕທີ່ໄດ້ອາໄສຢູ່ໃນສະຖານທີ່ແຫ່ງນີ້ໃຫ້ດີຂຶ້ນ. ວຽກງານສິ່ງນີ້ຈະເດີນໜ້າໄປບໍ່ໄດ້ຖ້າຫາກຂາດການຊ່ວຍເຫຼືອຈາກບັນດາຜູ້ອາສາສະໝັກ!
ໃນໂປຼແກຼມການກໍ່ສ້າງຄອກສັດ ແລະ ລ້ຽງດູສັດປ່າແຕ່ລະມື້ພວກເຮົາຈະເຮັດວຽກແຕກຕ່າງກັນໄປ ເພື່ອລ້ຽງດູ ແລະ ເສີມສ້າງຊີວິດຂອງສັດປ່າທຸກໂຕຂອງພວກເຮົາໃຫ້ດີຂຶ້ນ. ທຸກໆຄົນທີ່ໄດ້ເຂົ້າມາເປັນອາສາສະໝັກຢູ່ໃນສູນຂອງພວກເຮົານີ້ກໍ່ໄດ້ຊ່ວຍພວກເຮົາເຮັດສະນ້ຳ, ຄອກສັດໃໝ່ ຫຼື ສິ່ງໄຕ່ປີນຕ່າງໆເຮັດໃຫ້ສິ່ງດັ່ງກ່າວນີ້ເກີດຄຸນປະໂຫຍດຕໍ່ກັບຊີວິດຂອງສັດປ່າທີ່ໃກ້ຈະສູນພັນຢ່າງຍິ່ງໃນຫຼາຍໆປີຂ້າງໜ້າ.
